Amos 4
1Samaria wali bedemiru-o bi ogo hale hadaba. Tí nogo bulumagarume tani dewa nowa habatigihe hagagobi tí bame biruwa tígua wali agali yagibano karubi burupale karubi dara halu biamogo nabi howa ti genda yu helonaga mo ya haga bedemigoni. Tígua tí agalinihondo lulu iba dewa noliya ngi lalu haya haabo hagaore bedemigoni. 2Anduane Homogo Bibahende Haru Haame Ho Haga kago ibugua mana tigabiore biagago bi hongo howaore lo wialu lalu, Heneneore horo mbira tagira ibulebira. Horo ogoni ibirangi tí wena hugume bibahende bolo magamaga buwa pume hende howa gililo yalu polebira. Wena hugume bo ledagola agalime gililo yamiagadagua tí gililo yalu polebira. 3Pabe gialo wini wiagoria minu yalu puwa Hamono dindihayagi batagi holebira.Anduane Homogohanda Isaraele wali agaliru pani minigo milowa tinaga embone giambe henego ogo
4Anduane Homogo Bibahende Haru Haame Ho Haga kago ibugua ogodagua leda, Ai Isaraele wali agaliru-o tí áyu ogoni pudaba. Amu Bedele dindiha i̱ mitangi bialu lotu laga biagoha mana koru bima pudaba. Giligala tanohabi lotu laga biagoria mana ko ngaru biato hama pudaba. Egerebagi bibahendengi nogoru i̱nihondo lomabu ngule yalu ibalimu. Ani bialu horo tebone bibahendengi mbirale ngamirupi halu tale bialu pinigo i̱nihondo loma ngule yalu ibalimu. 5Ani bialu mberedi loma buwa i̱hondo ka̱i̱ lalu ngia naberemi. Tígua mbirale pi halu tale buwa pinigo i̱hondo ngia naberemi. Ani buwa tíninaga mini yaraga halimu. Mana ogonidagua bule tí hamelo hagayagonaga laro, lene.6Anduane Homogohanda ogodagua lara, I̱nime tínaga tano bibahendeha hina gari timbuniore ibilarugola tomo naneore harimigoni. I̱nime binidalo manda bialu mini beregeda nabiore kamigoni. 7Ai tomo anda helonaga dalu ibaga wiyagoni naibilo payarugoni. Tano maruha dalu ibilalu maruha naibile waharu. Mabu maruha gomba helonaga iba dalu ibilarugo maruha naibilarugola dindi lebola daga hayagoni. 8Wali agali tano mbirahayagi hagaru ti tano mendeha iba taya bima piyago nabereyane handarimigoni. I̱na urunidagua birugola tígua i̱ni kogoha mini beregedalu dai nabi kamigoni, lene.
9Anduane Homogohanda ogodagua lara, I̱na puyabu poboyogobiore ibilarugola tínaga mabuha tomo hengemiruha mo ko holene tagira ibiyagoni. Pagaya aleme tínaga mabuha tomo hengemirubigerebi lini dagane mabu hengemirubi tínaga poge irane hearubi olibe irane hearubi bibahende naiore hayagoni. Ani biyago hondowa tíni mini beregedabehego naberegedeore kamigoni, lene.
10Anduane Homogohanda laabo halu lalu, Warago koorene ko mbirame abale Iyibi wali agali bo waharudagua tíbi ani bulebero. Ani bialu wai birimingi howa waitigi agalime tínaga igiri daliahe hearu bo wahai halu tínaga nogo hosi hemiruni waitigi agali hearume haru halu piai helarugoni. Ani buwa wai bialu agali bo payapaya bini tí hemigoria wiarume ngu timbuni bialu wiyaru manda bibehego tí namandabi dege howa mini beregeda nabiore kamigoni, lene.
11Ani lowa Anduane Homogohanda lalu, Abale Sodomo Gomorala mo ko howa bo waharudagua tí maru mo ko halu bo waharugoni. Ani birugo ai wali agali maru áyu kamiruni tí ira timbuni dene daba tebo dugu wini ngaligobi kamigoni. Tí anidagua bini harimadalo manda bibehe kamigo howa mini beregeda nabiore kamigonida. Ani bidamigonidago nde i̱na Isaraele wali agali tí mo ko howa boliyago ani bialu hadaba. Ai bi ogoni Anduane Homogo i̱nime heneneore tagira pelogoria lo werogo tí bibahende manani howa tale buliya íbu hai hole kamigoni, lene. a
Anduane Homogo ibu mbirale bibahendenaga hongo haiheore kago ogo
(Amoso 5.8—9, 9.5—6)
13Hari timbuni karu wabialu puyabu poraru pelaga Ngode Datagaliwabe ibuore kagoni.Ibugua ibuninaga bu miniha mitangi bu karu wali agalihondo lapani haga ka.
Horombenaga wá holene ngago mo arumaho helaga kagoni.
Ibu dindi hari ngaruha ibagabu haga kagoni.
Ibunaga mini ogo,
Anduane Homogo Ngode Datagaliwabe Hongo Haiheore kagoni,
lalu lolene nga.
Copyright information for
HUI